Dogana e Qafë Thanës, një nga pikat më të rëndësishme kufitare dhe hyrëse në vend, ka nisur procesin e shumëpritur të rikonstruksionit të plotë, pas një periudhe të gjatë në gjendje të degraduar.
Për vite me radhë, ambientet e amortizuara, infrastruktura e vjetëruar dhe kushtet e papërshtatshme për punonjësit dhe udhëtarët, jo vetëm që vështirësonin punën dhe qarkullimin, por krijonin edhe një shije të keqe te turistët dhe qytetarët e huaj që hynin për herë të parë në Shqipëri.
Investimi i ri përfshin riorganizimin e territorit, përmirësimin e ambienteve të brendshme dhe të jashtme, ndërtimin e zyrave funksionale dhe moderne, si dhe instalimin e elementëve bashkëkohorë që rrisin cilësinë e shërbimit dhe kontrollit doganor.
Objektivi është që kjo pikë strategjike të mos jetë më thjesht një kufi formal, por një derë mikpritëse që reflekton standardet europiane dhe imazhin e një Shqipërie të hapur, funksionale dhe të përkushtuar ndaj turizmit, sigurisë dhe zhvillimit.
