Pas publikimit të një lajmi në rrjete sociale dhe disa media, ku pretendohej se ushtarët e Forcave të Armatosura në Korçë janë të pajisur me cizma të grisura, burime zyrtare nga Ministria e Mbrojtjes e kanë përgënjeshtruar kategorikisht këtë informacion.
Sipas të dhënave zyrtare të siguruara nga bufiurte.al, vetëm gjatë vitit 2025 janë dorëzuar 1 077 palë këpucë për efektivët e Forcave të Armatosura, ndërsa aktualisht ka ende këpucë në gjendje dhe procesi i furnizimit vijon normalisht.
Ministria e Mbrojtjes sqaron se pajisja me veshmbathje e efektivëve realizohet sipas standardeve dhe planifikimit logjistik, duke garantuar që çdo ushtar të ketë mjetet e nevojshme për kryerjen e detyrës.
Institucionet përgjegjëse theksojnë se lajmi i publikuar është i pavërtetë dhe keqinformues, duke krijuar një perceptim të gabuar mbi gjendjen reale të Forcave të Armatosura në Korçë.
Ministria u bën thirrje mediave dhe publikut të informohen nga burime zyrtare, për të shmangur përhapjen e lajmeve të pasakta që dëmtojnë imazhin e institucioneve shtetërore dhe vetë efektivëve në shërbim.
