Një medalion i rrallë i Divizionit të Këmbësorisë “TARO” mbart të gdhendur hartën e zonës së Llëngës, një dëshmi e qartë e ngjarjeve të Luftës Italo-Greke në territorin e Mokrës.
Divizioni “TARO” zbarkoi në Shqipëri në nëntor të vitit 1940, për t’u ardhur në ndihmë divizioneve “Venezia” dhe “Arezzo”, të cilat kishin pësuar humbje të rënda në përplasjet me ushtrinë greke në zonën e Pogradecit dhe Mokrës.
Forcat italiane të “TARO”-s organizuan mbrojtjen përgjatë luginës së Shkumbinit, duke hyrë në vijën e frontit në sektorin Guri i Llëngës – Shkumbin.
Pavarësisht ofensivave të ushtrisë greke, pozicionet e mbajtura nga ky divizion nuk u thyen, duke ruajtur kontrollin mbi Gurin e Llëngës, një element që spikat qartë në relievin e medalionit.
Këto pozicione u mbajtën deri në prill të vitit 1941, kur ushtria greke u zmbraps si pasojë e ndërhyrjes gjermane në Greqi.
Në figurat 1–2, medalioni paraqet me hollësi toponimet Guri i Topit, Maja e Brumbullit, Guri i Llëngës, Shkumbini dhe Llënga – vendet ku Divizioni “TARO” ruajti pozicionet për afro gjashtë muaj.
Në fig. 3, shfaqen ushtarë italianë teksa kalojnë në kanionin e Llëngës (Gryka e Gurit), në degëzimin historik të Rrugës Egnatia, në vitin 1941.
