Kryetari i Këshillit të Qarkut Korçë, Erjon Nexhipi, ka zgjedhur që të bashkohet me familjen në Kanada. Largimi i tij shënon fundin e një periudhe intensive pune, ku ai ka lënë gjurmë të dukshme në zhvillimin e qarkut.
Nexhipi është një emër i njohur për publikun korçar, fillimisht si pedagog dhe biznesmen, e më pas si këshilltar në Këshillin Bashkiak të Korçës dhe kryetar i Këshillit të Qarkut. Gjatë kohës në detyrë, ai ka realizuar një sërë projektesh që kanë ndikuar drejtpërdrejt në ekonomi, kulturë, arsim dhe infrastrukturë.
📌 Vetëm gjatë vitit 2024, Nexhipi përmbylli projekte si:
Mbështetja e ICT-së në Qarkun e Korçës
“20 bletërritës të rinj” me ndihmën e TİKA-s
Rikonstruksioni i segmenteve rrugore Grunjas–Kaçak–Shqitas
Festivale kulturore e sportive si Mokra n’Fest, Olimpiadat e Shkencave, Autonom Fest
Promovimi i turizmit në panaire ndërkombëtare
Ndërsa në vitin 2025, ai arriti të ngrejë Qendrën e Përpunimit të të Dhënave me bazë Inteligjencën Artificiale, projekte në turizëm si kajak në Prespën e Vogël dhe aktivitete të shumta kulturore, përfshirë konferenca shkencore e festivale tradicionale.
Aktualisht, janë në zbatim disa projekte të mëdha si ndërtimi i Muzeut të Palafitëve dhe tharjes së Kënetës së Maliqit, si dhe një sërë investimesh në shërbime sociale, kulturë, turizëm dhe infrastrukturë në bashkitë e qarkut.
Me dorëheqjen e tij, Korça humbet një nga figurat kryesore të menaxhimit lokal, ndërsa Erjon Nexhipi do të nisë një kapitull të ri në Kanada, së bashku me familjen e tij.
