KORÇË – Gjykata e Korçës ka caktuar këtë të mërkurë masën e sigurisë “arrest me burg” për Kristjan Sterjon, i dyshuar për vrasjen e 20-vjeçarit Joan Zyko, ngjarje e ndodhur më 8 gusht në Korçë.
Seanca për caktimin e masës së sigurisë u zhvillua në kushte të rrepta sigurie. Prokurorja Artenida Toska kërkoi masën “arrest me burg”, kërkesë që u pranua nga gjykata.
Për shkak të ndjeshmërisë së lartë të çështjes, përreth Gjykatës së Korçës u vendosën forca të shumta policie. Në seancë nuk u paraqitën familjarë të viktimës apo të të dyshuarit.
Joan Zyko, 20 vjeç, u qëllua me armë zjarri pasditen e 8 gushtit në lagjen nr. 14 të Korçës. Sipas të dhënave të hetimit, mes tij dhe Kristjan Sterjos kishte pasur një konflikt të mëparshëm.
Në dëshminë e dhënë para hetuesve, Sterjo ka deklaruar se konflikti kishte nisur rreth dy javë para ngjarjes. Sipas versionit të tij, ditën e krimit pati fillimisht një përplasje fizike mes tyre, pas së cilës ai u largua drejt banesës.
Më pas, sipas dëshmisë, Sterjo ka marrë një armë zjarri që e kishte fshehur dhe është rikthyer në zonën ku ndodhej Zyko. Ai ka deklaruar se e ka ndjekur 20-vjeçarin dhe ka qëlluar me armë në drejtim të tij.
Pas ngjarjes, Sterjo u largua nga vendi dhe qëndroi për disa orë në arrati. Policia e Korçës e lokalizoi dhe e arrestoi rreth mesnatës së 9 gushtit, pranë zonës së Mitropolisë.
Gjatë hetimeve janë administruar prova materiale dhe janë sekuestruar sende që dyshohet se lidhen me ngjarjen.
Sterjo po hetohet për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe i municionit”.
Me vendimin e Gjykatës së Korçës, ai do të qëndrojë në paraburgim gjatë vijimit të hetimeve, ndërsa autoritetet vijojnë punën për zbardhjen e plotë të rrethanave dhe motivit të ngjarjes.
