Ecjet malore apo turizmi i aventurës po bëhen gjithnjë e më të dashura për banorët e Korçës dhe turistët që vizitojnë juglindjen e vendit.
Me një larmi shtigjesh dhe peizazhe që ndryshojnë çdo stinë, Korça ofron mundësi të shkëlqyera për ecje gjatë gjithë vitit. Sidomos në verë destinacionet malore ofrojnë jo vetëm freski dhe bukuri natyrore, por edhe një mënyrë të shëndetshme për të kaluar kohën. Pedagogu i apasionuar pas natyrës Eriseld Kalemaj tregon se janë kryesisht turistët e huaj ata që kërkojnë të udhëtojnë drejt shtigjeve malore të cilat të ndërthurura me kulturën vendase dhe mikpritjen janë një atraksion i veçantë.
Ecjet në shtigje të ndryshme të rajonit, duke përfshirë Parkun e Drenovës, malin e Gramozit, zonën e Vithkuqit dhe Prespën mbeten ndër më të pëlqyerat por rritja e interesit sipas Kalemajt kërkon më shumë guida lokale të kualifikuara.
Të rinj, familjarë, por edhe turistë të huaj që duan të përjetojnë natyrën shqiptare nga afër po zgjedhin gjithmonë e më tepër të bëjnë hiking shtigjet malore të juglindjes për të përjetuar një eksperiencë ndryshe larg turizmit masiv.
