Një rast i kontrabandës së mallrave është goditur nga Policia e Korçës, si rezultat i kontrolleve dhe informacioneve të siguruara në rrugë operative.
Specialistët e Seksionit për Hetimin e Krimeve Ekonomike dhe Financiare kanë kapur në flagrancë një shtetas që transportonte mallra të dyshuara të kontrabanduara nga Greqia, pa kryer procedurat e zhdoganimit.
Shërbimet e Policisë kanë ndaluar në lagjen nr. 6, Korçë, automjetin me drejtues shtetasin V. T., 49 vjeç, banues në Korçë. Gjatë kontrollit në automjet janë gjetur veshje të ndryshme pa fatura tatimore, të cilat dyshohet se ishin futur në territorin shqiptar në mënyrë të paligjshme.
Në vijim të veprimeve procedurale:
- u arrestua në flagrancë shtetasi V. T. për veprat penale:
- “Kontrabanda me mallra të tjera”
- “Tregtimi dhe transportimi i mallrave që janë kontrabandë”
- “Ruajtja ose depozitimi i mallrave kontrabandë”
- “Fshehja e të ardhurave”
- u procedua penalisht shtetasi R. M., 40 vjeç, banues në Pogradec, doganier në Pikën e Kalimit Kufitar Kapshticë, për veprën penale “Shpërdorimi i detyrës”, pasi dyshohet se nuk ka kryer kontrollin e automjetit sipas detyrës funksionale.
Mallrat e dyshuara kontrabandë dhe automjeti me të cilin transportoheshin janë sekuestruar në cilësinë e provës materiale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
