Kolonja po shndërrohet gjithnjë e më shumë në një destinacion të preferuar për turistët e apasionuar pas çiklizmit, duke tërhequr vizitorë të huaj që zgjedhin të eksplorojnë bukuritë natyrore të zonës mbi dy rrota.
Së fundmi, një grup turistësh italianë kanë përshkuar rrugët panoramike të Kolonjës me biçikleta, në një tur që ndërthur sportin, aventurën dhe turizmin e gjelbër. Ata shprehen të mahnitur nga natyra mbresëlënëse, ushqimi tradicional, çmimet e favorshme dhe mikpritja e banorëve vendas.
Për shumë prej tyre, kjo ishte vizita e parë në Shqipëri, por jo e fundit, ndërsa të tjerë janë rikthyer disa herë, duke e konsideruar Kolonjën një eksperiencë të veçantë, ndryshe nga destinacionet e zakonshme europiane.
Sipas guidës shqiptare që shoqëron grupin, një pjesë e mirë e turistëve të huaj rikthehen sërish në Shqipëri pasi mbeten të impresionuar jo vetëm nga peizazhet, por edhe nga respekti që gjejnë në rrugë, ku drejtuesit tregojnë kujdes ndaj çiklistëve.
Turizmi sportiv dhe ai i gjelbër po kthehen kështu në një mundësi të re zhvillimi për Kolonjën, duke promovuar zonën si një destinacion ideal për ata që kërkojnë natyrë, traditë, aventura dhe mikpritje shqiptare.
