Më shumë se gjashtë muaj pas përmbytjeve masive që prekën fushën e Maliqit, fermerët e zonës thonë se ende nuk kanë marrë dëmshpërblimet e premtuara për dëmet e shkaktuara në tokat dhe prodhimet bujqësore.
Përmbytjet e muajve dhjetor dhe janar lanë nën ujë mbi 400 hektarë tokë bujqësore, duke shkaktuar humbje të konsiderueshme ekonomike për qindra fermerë. Edhe pse në atë periudhë u premtua mbështetje financiare nga institucionet përgjegjëse, fermerët thonë se fondet ende nuk kanë mbërritur.
Një prej tyre është edhe Geni Fraholli nga fshati Sheqeras, i cili tregon se përmbytjet i dëmtuan 18 hektarë tokë të mbjellë me grurë dhe elb, ndërsa në disa parcela ende nuk është e mundur mbjellja e kulturave të reja për shkak të pranisë së ujit.
Edhe Drejtoria e Bujqësisë në Bashkinë Maliq pranon se dëmshpërblimet nuk janë shpërndarë ende. Sipas drejtorit Aurel Zenullari, të gjitha procesverbalet dhe dokumentacioni përkatës janë përgatitur dhe janë përcjellë pranë institucioneve përgjegjëse, por deri tani nuk ka një përgjigje përfundimtare për fermerët.
Ndërkohë, Bashkia e Maliqit ka lehtësuar fermerët e prekur duke i përjashtuar nga pagesa e taksave vendore për sipërfaqet që vazhdojnë të mbeten nën ujë. Megjithatë, fermerët theksojnë se humbjet ekonomike mbeten të mëdha dhe kërkojnë që premtimet për dëmshpërblim të realizohen sa më shpejt.
