Një mundësi e re për arsimim dhe riintegrim është krijuar për personat e privuar nga liria në Institucionin e Ekzekutimit të Vendimeve Penale (IEVP) Korçë.
Për herë të parë, krahas arsimit 9-vjeçar, në këtë institucion do të ofrohet edhe arsimi i mesëm, duke zgjeruar mundësitë për vijimin e shkollimit dhe zhvillimin personal të të dënuarve.
Nisma synon t’u japë personave të privuar nga liria mundësinë për të fituar njohuri të reja, për të vijuar procesin arsimor dhe për të krijuar perspektiva më të mira për të ardhmen, duke e kthyer edukimin në një instrument të rëndësishëm rehabilitimi dhe riintegrimi në shoqëri.
Për këtë hap të ri është vlerësuar edhe mbështetja e drejtoreshës së Zyrës Vendore të Arsimit Parauniversitar Korçë, Marjana Baçellari, e cila ka kontribuar në realizimin e këtij procesi.
Arsimimi shihet si një mundësi e dytë për personat e privuar nga liria, duke dëshmuar se edukimi dhe dija mund të kapërcejnë edhe kufijtë e institucioneve të vuajtjes së dënimit.
