Korçë, 14 korrik 2025 – Sot u çel zyrtarisht edicioni i radhës i Korça ICT Academy – Code for Albania, një nga programet më të rëndësishme dhe gjithëpërfshirëse të edukimit teknologjik për të rinjtë në Shqipëri.
Në këtë edicion, akademia mirëpret 100 nxënës të përzgjedhur nga e gjithë Shqipëria, të apasionuar pas teknologjisë, kodimit dhe inovacionit, të cilët do të marrin pjesë në një kamp intensiv dy-javor në qytetin e Korçës.
Programi ofron mbi 80 orë trajnimi praktik nën udhëheqjen e instruktorëve ndërkombëtarë nga Stanford University, si dhe nga qendra prestigjioze të teknologjisë dhe edukimit në SHBA dhe Kanada. Përmes një metodologjie të avancuar dhe një qasje ndërdisiplinore, pjesëmarrësit do të zhvillojnë aftësi teknologjike, do të punojnë mbi projekte reale dhe do të përfitojnë mentorim të personalizuar.
Ky aktivitet synon të nxisë talentin vendas, të krijojë mundësi të reja për zhvillimin profesional të të rinjve dhe të kontribuojë në përgatitjen e brezit të ardhshëm të krijuesve dhe liderëve në fushën e teknologjisë dhe inovacionit.
Korça ICT Academy – Code for Albania 2025 zhvillohet nga data 14 deri më 27 korrik, duke e kthyer qytetin e Korçës në një qendër të gjallë të dijes dhe bashkëpunimit ndërmjet të rinjve nga e gjithë Shqipëria.
