Kolonjë | Energjia e rinovueshme po tërheq gjithnjë e më shumë interes nga sektori privat, dhe kjo reflektohet edhe në aplikimet e fundit për ndërtimin e impianteve fotovoltaike. Kompania “Gramozi Green Energy” ka dorëzuar një aplikim pranë Ministrisë së Infrastrukturës dhe Energjisë për ndërtimin e një centrali diellor me kapacitet të instaluar 38 MW në territorin e Bashkisë Kolonjë.
Ky projekt nuk do të përfitojë nga skemat e mbështetjes shtetërore, nuk është me koncesion dhe nuk do të ketë garanci për shitjen e energjisë së prodhuar.
Më herët gjatë këtij viti, kompania “X ONE” aplikoi për ndërtimin e një impianti tjetër diellor me kapacitet 54 MW në zonën e Tërpanit, Bashkia Poliçan, gjithashtu pa përfituar nga skemat e mbështetjes qeveritare.
Vetëm pak muaj më vonë, u paraqitën edhe dy aplikime të tjera për ndërtimin e impianteve fotovoltaike me një kapacitet total 148.5 MW. Njëri nga projektet parashikon ndërtimin e një centrali me 128 MW në Sheq Marinas të Fierit, ndërsa tjetri parashikon një central me 20.5 MW në Bashkinë Cërrik. Asnjë nga këto projekte nuk mbështetet nga lehtësitë shtetërore për dokumentacion apo garanci shitjeje.
Tendenca për rritjen e interesit ndaj energjisë diellore është vënë re veçanërisht gjatë vitit 2024, kur vetëm në muajin dhjetor u paraqitën 7 aplikime për impiante me një kapacitet të përgjithshëm 416.5 MW, të shpërndarë në disa bashki të vendit.
Aktualisht, megjithëse përdorimi i energjisë diellore në Shqipëri nga impiantet e mëdha është ende në nivele të ulëta, pjesa e saj në prodhimin total të energjisë ka pësuar rritje të ndjeshme. Sipas të dhënave zyrtare për vitin 2024, rreth 6.25% e energjisë totale në vend u prodhua nga impiantet fotovoltaike, me centralin diellor të Karavastasë që zuri 53% të kësaj sasie.
Energjia diellore po bëhet gjithnjë e më shumë pjesë e së ardhmes energjetike të vendit.
