Gjykata e Korçës po funksionon aktualisht me 10 gjyqtarë, pesë më pak nga organika prej 15 vendesh. Kjo situatë, sipas kryetarit të Dhomës së Avokatisë së Rajonit të Juglindjes, Nevzat Tarelli, është pasojë e transferimeve të gjyqtarëve drejt gjykatave të tjera, si dhe procesit të rivlerësimit kalimtar.
Transferimi i gjyqtarëve sipas Tarelli është problemi më i madh që ndikon në ecurinë normale të proceseve gjyqësore. Largimi i tyre dhe kalimi i dosjeve tek gjyqtarët e tjerë bën që proceset të nisin nga e para, duke shkaktuar vonesa të ndjeshme.
Mungesa e gjyqtarëve në Gjykatën e Korçës ndikon veçanërisht tek çështjet civile, të cilat kanë pësuar zvarritje të dukshme në shqyrtim. Avokatët e zonës kërkojnë që organet përgjegjëse të marrin masa për plotësimin e vakancave, në mënyrë që qytetarët të mos vuajnë pasojat e vonesave në drejtësi.
