Djali i gazetarit të njohur shqiptar Artan Hoxha, u arrestua të hënën, më 19 janar, në Tiranë, nën dyshimet për përfshirje në krim të organizuar, konkretisht trafikim të qenieve njerëzore. Geri Hoxha dhe një person tjetër u shpallën në kërkim me urdhërarrest ndërkombëtar, me kërkesë të UNMIK.
Lidhur me rastin, Artan Hoxha ka folur ekskluzivisht për “Klan Kosova”, duke thënë se ende nuk është i informuar për akuzat konkrete ndaj djalit të tij. I shqetësuar, ai ka thënë se në kohën kur pretendohet se janë kryer veprat, djali i tij ka qenë vetëm 13 vjeç.
“Ka disa ditë që ka ndodhur kjo, por unë ende nuk kam parë asnjë dokument apo vendim zyrtar. Është e çuditshme si mund të akuzohet një fëmijë për pjesëmarrje në grup të strukturuar kriminal. Kam frikë se po më bëhet padrejtësi”, tha Hoxha.
Sipas gazetarit shqiptar, autoritetet në Kosovë kanë bërë kërkesë për ekstradim, por deri më tani nuk i është dorëzuar asnjë dosje apo dokumentacion zyrtar. “Më kanë thënë se dokumentet do t’u përcillen autoriteteve shqiptare”, shtoi ai.
Gazetari Artan Hoxha ka deklaruar se në momentin e arrestimit, djali i tij ishte duke shkuar në punë, sepse punon si laborant dentar.
“Në xhep kishte vetëm 10 mijë lekë. Bashkë me të u arrestua edhe një shofer ambulance. Si mund të lidhet kjo me krim të organizuar?”, e ngriti si pyetje gazetari.
Gjatë bisedës me gazetarët shqiptarë në Kosovë, Artan Hoxha ka ngritur dyshime për trajtimin e të birit në ambientet e paraburgimit, duke theksuar se deri tani nuk ka mundur ta takojë Gerin, duke shprehur edhe frikë për sigurinë e tij.
