Shtëpia ku lindi Faik Konica, në qytetin e Konicë, ndodhet sot në gjendje të rënduar, e dëmtuar dhe e mbuluar nga shkurret, duke lënë në harresë një prej vendeve më simbolike të historisë shqiptare.
Godina, e njohur si shtëpia e Hysen Bej Shishkos dhe e identifikuar nga institucionet përkatëse greke si vendlindja e Faik Konicës, është kthyer në një rrënojë, larg vëmendjes dhe kujdesit që meriton.
Biznesmeni Beqir Potka, një nga 17 filantropët shqiptarë që kontribuuan në rikthimin e eshtrave të Faik Konicës në atdhe, e cilëson të dhimbshme gjendjen e kësaj godine. Ai u bën thirrje institucioneve shqiptare që të nisin bisedimet me autoritetet greke për restaurimin e saj dhe kthimin në muze.
Sipas Potkës, financimi mund të sigurohet nga komuniteti shqiptar në Shtetet e Bashkuara të Amerikës, ashtu siç u bë edhe për rikthimin e eshtrave të Konicës në Shqipëri.
Mes mureve të rrënuara dhe gjurmëve të kohës, kjo shtëpi mbetet një dëshmi e historisë së një prej figurave më të shquara të kombit shqiptar. Mbetet për t’u parë nëse ajo do të vijojë të mbetet në harresë, apo do të rikthehet në një muze që nderon jetën dhe veprën e Faik Konicës për brezat që do të vijnë.
