Në kodrat e qytetit të Korçë, dhjetëra fëmijë të shoqëruar nga prindërit dhe gjyshërit e tyre janë bërë pjesë e një nisme mjedisore për mbjelljen e pemëve, një aktivitet disa vjeçar që synon të kthehet në traditë qytetare.
Pjesëmarrësit kanë kontribuar në gjelbërimin e zonës, duke rikthyer vëmendjen te rëndësia e ruajtjes së natyrës dhe edukimit mjedisor që në moshë të vogël.
Një nga banoret e qytetit kujton se kjo praktikë ka ekzistuar prej dekadash, kur nxënësit angazhoheshin rregullisht në mbjelljen e pemëve në zonën e Mali i Moravës.
“E kemi pyllëzuar vetë kur ishim të vegjël, ishte pjesë e programit shkollor. Çdo shkollë kishte kuotën e saj dhe vinim çdo javë për të mbjellë. I gjithë mali i Moravës është mbjellë me duart tona”, shprehet ajo, duke theksuar rëndësinë e trashëgimit të këtij veprimi tek brezat e rinj.
Edhe fëmijët janë bërë pjesë aktive e kësaj nisme. Një prej tyre shprehet se dëshiron që ambienti të jetë i pastër dhe të kujdeset vetë për pemët që po mbjell sot.
Ndërkohë, një nga organizatorët, Ardit Konomi, thekson se pjesëmarrja ka qenë e lartë dhe interesi vijon të rritet.
“Kjo është një traditë e bukur që po rikthehet. Jo vetëm fëmijë dhe gjyshër, por shumë qytetarë janë bashkuar. Është një edukim i domosdoshëm për komunitetin dhe për të ardhmen”, u shpreh ai.
Gjatë këtij viti, nisma synon mbjelljen e rreth 1500 pemëve, duke kontribuar në përmirësimin e kurorës së gjelbër në kodrat e Mali i Moravës dhe në krijimin e një mjedisi më të pastër për qytetin.
