Specialistët për Hetimin e Narkotikëve në Drejtorinë Vendore të Policisë Korçë arrestuan në flagrancë shtetasin S. D., 36 vjeç, banues në fshatin Çetë, Bilisht. Arrestimi u bë pasi, gjatë kontrollit nga shërbimet e Policisë, në automjetin ku ky shtetas ishte pasagjer, ai ka hedhur nga dritarja një sasi të vogël lënde të dyshuar narkotike kokainë, e cila u sekuestrua në cilësinë e provës materiale.
Nga ana tjetër, shërbimet e Komisariatit të Policisë Korçë referuan materialet në Prokurori dhe nisën procedim penal ndaj shtetasit Xh. H., 25 vjeç, banues në fshatin Dvoran, për veprën penale “Përndjekja”. Ai dyshohet se ka publikuar në rrjete sociale një video intime të një 24-vjeçareje, si dhe e ka kanosur dhe fyer atë përmes adresave të rreme në rrjete sociale.
Po ashtu, shërbimet e Komisariatit të Policisë Pogradec referuan materialet në Prokurori, ku filloi procedimi penal për shtetasin R. B., 34 vjeç, banues në Pogradec. Ky shtetas dyshohet se, në lagjen nr. 5 të qytetit, me vetëgjyqësi ka dëmtuar kangjellat e ballkonit të banesës së shtetases T. Ç., me pretendimin se ishin vendosur në pronën e tij.
Ndërkohë, më datë 05.01.2025, në lagjen nr. 18, Korçë, në banesën e shtetasit E. P., 36 vjeç, rezident në Shtetet e Bashkuara të Amerikës, është konstatuar vjedhja e një shume parash dhe disa bizhuterive. Policia po punon për identifikimin dhe kapjen e autorit ose autorëve.
Të gjitha materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme ligjore.
