E lindur dhe rritur në Devoll, në një familje të ndërtuar mbi dashurinë, parimet dhe vlerat njerëzore, Dr. Redina Agolli ka zgjedhur mjekësinë si profesion dhe Pogradecin si vendin ku do të ndërtonte jetën e saj profesionale.
Pas përfundimit të studimeve të larta pranë Fakultetit të Mjekësisë në Universitetin e Tiranës, në vitin 2015, ajo nisi të punojë në Pogradec, qytet me të cilin do të lidhej jo vetëm profesionalisht, por edhe emocionalisht.
Prej katër vitesh, pasi është diplomuar si mjeke specialiste në Neurologji, Dr. Agolli ushtron profesionin pranë Spitalit të Pogradecit, duke u shërbyer pacientëve të qytetit dhe zonave përreth.
Në punën e saj të përditshme ajo trajton një gamë të gjerë patologjish neurologjike, përfshirë aksidentet vaskulare cerebrale ishemike dhe hemorragjike, epilepsinë, dhimbjet e kokës, patologjitë degjenerative të kolonës vertebrale, sëmundjet demielinizante, demencat dhe polineuropatitë me shkaqe të ndryshme.
Kualifikimi i saj profesional ka vijuar edhe pas specializimit. Gjatë viteve të studimeve pasuniversitare dhe periudhës së ushtrimit të profesionit, ajo ka ndjekur trajnime dhe aktivitete profesionale të lidhura me EAN, EFNS, CONY dhe ECTRIMS, duke synuar përditësimin e vazhdueshëm të njohurive në fushën e neurologjisë.
Për Dr. Agollin, të ushtrosh profesionin pranë qytetit ku jeton është më shumë se një detyrë profesionale.
“Të shërbesh pranë qytetit ku banon është jo vetëm profesion, por mision dhe sfidë e çdo dite për të qenë sa më afër pacientëve dhe familjeve të tyre”, shprehet ajo.
Një pjesë e rëndësishme e punës së saj është edhe shërbimi në urgjencë, në çdo orë të ditës dhe natës, si dhe bashkëpunimi me kolegët dhe ekipet e tjera mjekësore.
Historia profesionale e Dr. Redina Agollit është edhe një shembull i mjekut që ka zgjedhur të ndërtojë karrierën dhe të japë kontributin e tij aty ku jeton, duke e parë shërbimin ndaj pacientëve jo vetëm si profesion, por si një përgjegjësi dhe mision njerëzor.
