Korçë – Procedime penale për narkotikë dhe dhunë
Specialistët e Sektorit për Hetimin e Narkotikëve referuan materialet në Prokurori, ku nisi procedimi penal për shtetasin S. I., 24 vjeç, banues në Korçë, pasi gjatë kontrollit fizik iu gjet një sasi lënde e dyshuar narkotike kanabis.
Po në Korçë, shërbimet e Komisariatit referuan materialet në Prokurori për shtetasin A. H., 52 vjeç, i dyshuar për goditje të një 57-vjeçari, për motive të dobëta.
Ndërkohë, në lagjen nr. 17, më datë 08.12.2025, është konstatuar e pajetë në banesë shtetasja B. M., 70 vjeçe, dyshohet për shkaqe natyrale.
Pogradec – Procedime për dhunë, goditje dhe baste
Shërbimet e Policisë Pogradec referuan materialet në Prokurori për shtetasit:
- E. Xh., 51 vjeç, për dhunë fizike ndaj motrës, e cila u pajis me urdhër mbrojtjeje;
- F. Ç., 58 vjeç, banues në fshatin Gurras, i dyshuar se ka goditur me pëllëmbë një të mitur, për motive të dobëta;
- Një 16-vjeçar, pasi gjatë kontrollit të celularit të tij në një lokal u gjetën faqe të përdorura për baste sportive.
Gjithashtu u shpall në kërkim shtetasi A. T., 46 vjeç, banues në Pogradec, i cili ka thyer masën e sigurisë “Arrest në shtëpi”, të vendosur nga Gjykata e Korçës për veprën penale “Drejtimi i automjeteve në mënyrë të parregullt”.
Devoll – Vjedhje dhe aksident me pasojë vdekjen
Në Devoll, më datë 07.12.2025, shtetasi A. A., 52 vjeç, ka kallëzuar vjedhjen e një shume parash në banesën e tij, në fshatin Poloskë. Po vijojnë hetimet për identifikimin e autorëve.
Ndërkohë, rreth orës 11:45, në aksin “Korçë–Devoll”, te kryqëzimi i Progrit, drejtuesi i mjetit H. K. ka përplasur këmbësorin H. R., 79 vjeç, i cili humbi jetën në vendngjarje. Drejtuesi i automjetit u shoqërua në Komisariat për hetime të mëtejshme. Grupi hetimor, nën drejtimin e Prokurorisë, po punon për sqarimin e plotë të rrethanave.
Informacion paraprak – Fëmijë i aksidentuar në institucion parashkollor
Rreth orës 10:15, në Korçë, një fëmijë 2 vjeç është dërguar në spital, pasi dyshohet se është rrëzuar në kopshtin ku qëndronte. Ngjarja po hetohet për të përcaktuar rrethanat.
Materialet procedurale
Të gjitha rastet janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
