Banorët e lagjes 18 në qytetin e Korçës kanë ngritur shqetësimin për mungesën e ujitjes së hapësirave të gjelbra pranë pallateve ku banojnë, si edhe për gjendjen e një godine të vjetër dhe të amortizuar, e cila sipas tyre është kthyer në një burim ndotjeje dhe rrezik për shëndetin, për shkak të mbetjeve të grumbulluara ndër vite.
Sipas banorëve, mungesa e mirëmbajtjes së lulishteve ka bërë që ato të thahen, ndërsa godina e braktisur është kthyer në një vatër infeksionesh. Ata i bëjnë thirrje Bashkisë së Korçës të ndërhyjë sa më shpejt për zgjidhjen e këtyre problematikave, të cilat ndikojnë drejtpërdrejt në cilësinë e jetesës së tyre.
Në këtë bllok pallatesh jetojnë mbi 95 familje, të cilat kanë firmosur një kërkesë zyrtare drejtuar Bashkisë së Korçës, ku kërkojnë rikthimin e ujitjes së sipërfaqeve të gjelbra, si edhe pastrimin dhe rehabilitimin e godinës së amortizuar.
Pas interesimit pranë Bashkisë së Korçës, përfaqësues të institucionit kanë bërë të ditur se do të ndërhyhet për zgjidhjen e problematikës së ujitjes së hapësirave të gjelbra. Gjithashtu, ata kanë garantuar se do të merren masa për pastrimin dhe dezinfektimin e godinës së braktisur, me qëllim eliminimin e rrezikut që ajo paraqet për banorët.
