Specialistët për Hetimin e Krimeve të Komisariatit të Policisë Maliq arrestuan në flagrancë shtetasin K. A., 40 vjeç, banues në Bregas, pasi ka thyer masën e sigurisë “Arrest në shtëpi”.
Specialistët e Sektorit të Qarkullimit Rrugor arrestuan në flagrancë shtetasin E. C., 49 vjeç, banues në Plasë, pasi u kap duke drejtuar automjetin, në gjendje të dehur.
Gjithashtu, referuan materialet në Prokurori ku filloi procedimi penal për shtetasin P. I., 72 vjeç, banues në Rëmbec, pasi duke drejtuar mjetin bujqësor zetor, pa leje drejtimi, ka përplasur një automjet të parkuar, me pasojë dëme materiale, dhe më pas është larguar nga vendi i aksidentit.
Specialistët për Hetimin e Krimeve të Komisariatit të Policisë Korçë arrestuan në flagrancë shtetasin G. M., 43 vjeç, banues në Korçë, pasi dyshohet se ka ushtruar dhunë ndaj bashkëshortes së tij, e cila u pajis me urdhër mbrojtjeje.
Gjithashtu, referuan materialet në Prokurori ku filloi procedimi penal për shtetasit T. Ç., 18 vjeç dhe K. S., 19 vjeç, banues në Korçë, pasi dyshohet se kanë dëmtuar disa pajisje dhe kosha metalikë, te qyteza e fëmijëve.
Specialistët për Hetimin e Krimeve të Komisariatit të Policisë Devoll arrestuan në flagrancë shtetasin G. C., 54 vjeç, banues në Devoll, pasi ka ushtruar dhunë ndaj bashkëshortes së tij, e pajisur me urdhër mbrojtjeje.
Gjithashtu, referuan materialet në Prokurori ku filloi procedimi penal për shtetasit:
D. M., 36 vjeç, banues në Hoçisht, pasi dyshohet se nga pakujdesia ka shkaktuar zjarr në një sipërfaqe toke me bimësi dhe nga përhapja e flakëve është djegur dhe një sipërfaqe toke e mbjellë me grurë;
M. Z., 39 vjeç, K. Xh., 30 vjeç, dhe D. B., 38 vjeç, banues në Devoll, pasi dyshohet se kanë shkelur Moratoriumin e Gjuetisë. Në fshatin Tren, gjatë kontrollit në automjetin e tyre, shërbimet e Policisë gjetën 3 qen gjahu, 2 radio si të Policisë, 2 elektrikë dore dhe një pajisje GPS, të cilat u sekuestruan në cilësinë e provës materiale.
Specialistët për Hetimin e Krimeve të DVKM Korçë referuan materialet në Prokurori ku filloi procedini penal për shtetasit Xh. M., 26 vjeç, banues në Korçë dhe A. H., 56 vjeç, banues në Vlorë, për veprën penale “Kalimi i paligjshëm i kufirit shtetëror”.
Më datë 03.07.2025, rreth orës 16:30, shtetasi i mituar K. Ç., autik, ka tentuar të vetëdigjet, në banesë. Ai po merr ndihmë mjekësore në spital dhe është jashtë rezikut për jetën.
Materialet procedurale i kaluan Prokurorisë për veprime të mëtejshme.
