Drejtoria Vendore e Policisë Korçë ka bërë me dije një sërë ngjarjesh të regjistruara në 24 orët e fundit, që lidhen me shkelje të qarkullimit rrugor dhe vepra të ndryshme penale.
Specialistët e Sektorit të Qarkullimit Rrugor arrestuan në flagrancë shtetasin E. Sh., 37 vjeç, banues në fshatin Rov, Maliq, pasi u kap duke drejtuar automjetin në gjendje të dehur në rrugën “Libonik-Plasë”.
Ndërkohë, specialistët për Hetimin e Krimeve në Komisariatin e Policisë Korçë referuan materiale në Prokurori për disa raste. Procedim penal nisi ndaj një 34-vjeçari, i cili dyshohet se ka përndjekur ish-bashkëjetuesen e tij, e pajisur me urdhër mbrojtjeje. Po ashtu, një 38-vjeçar u procedua pasi dyshohet se ka kanosur një 22-vjeçar nëpërmjet celularit. Një tjetër rast përfshin një 15-vjeçar, i cili dyshohet se ka goditur me grushte dhe sende të forta një 18-vjeçar.
Në Komisariatin e Policisë Pogradec nisi procedimi penal për një 46-vjeçare, banuese në fshatin Shëngjergj, Maliq, e dyshuar për dhunë fizike ndaj motrës së saj.
Ndërsa në Maliq, një 42-vjeçar u procedua pasi kundërshtoi punonjësit e Policisë gjatë vendosjes së një mase administrative për parkim të gabuar. Gjithashtu, materialet iu referuan Prokurorisë për vlerësim edhe në lidhje me një 50-vjeçar, i cili dyshohet se u dëmtua nga avujt e ujit gjatë punës në një punishte bulmeti. Ai mori mjekim dhe u largua në banesë.
Në një tjetër zhvillim, policia bëri me dije se është gjetur trupi i pajetë i një 72-vjeçari, i cili ishte shpallur i humbur më herët. Trupi u gjet në vendin e quajtur “Çezma e Manushaqeve”, në malin Moravë. Sipas veprimeve hetimore dhe ekspertizës mjeko-ligjore, nuk janë konstatuar shenja dhune dhe dyshohet se vdekja ka ardhur për shkaqe natyrale.
Materialet procedurale i janë referuar Prokurorisë së Korçës për veprime të mëtejshme.
