Strukturat e Drejtoria Vendore e Policisë Korçë kanë ndërmarrë disa veprime gjatë 24 orëve të fundit, duke arrestuar dhe proceduar disa shtetas për vepra të ndryshme penale.
Specialistët e Qarkullimit Rrugor arrestuan në flagrancë shtetasin E. M., 48 vjeç, banues në Pogradec, pasi u kap në aksin rrugor “Pogradec–Korçë” duke drejtuar automjetin në gjendje të dehur.
Ndërkohë, specialistët për Hetimin e Krimeve të Komisariatit të Policisë Korçë referuan materialet në Prokurori, ku nisi procedimi penal ndaj shtetasit I. D., 58 vjeç, pasi gjatë kontrollit të celularit iu gjetën faqe aktive për baste sportive. Pajisja u sekuestrua në cilësinë e provës materiale.
Po ashtu, specialistët për Hetimin e Krimeve të Komisariatit të Policisë Devoll referuan materialet në Prokurori dhe nisën procedimin penal për shtetasin R. H., i cili u konstatua duke kryer punime ndërtimi pa leje.
Në një tjetër rast, më datë 19.04.2026, në fshatin Velitërnë, Maliq, një zjarr ka rënë në një ambient që shërbente për gatim pranë banesës së shtetasit A. Z. Si pasojë janë shkaktuar vetëm dëme materiale, ndërsa nga hetimet paraprake dyshohet se zjarri ka qenë aksidental.
Materialet procedurale i janë referuar Prokurorisë së Korçës për veprime të mëtejshme.
