Ndotja e mjedisit mbetet një ndër shqetësimet më të mëdha me të cilat përballet shoqëria jonë sot. Një ndër format më të përhapura të ndotjes është hedhja e mbetjeve të ndryshme përgjatë rrugëve, veçanërisht nga xhamat e makinave. Ky veprim, përveçse i dënueshëm nga qytetarët si mungesë e theksuar edukate, përbën një rrezik serioz për natyrën dhe shëndetin publik.
Banorët e zonave të prekura apelojnë për ndërgjegjësim dhe veprim të menjëhershëm. “Duhet të veprojmë sot, pasi nesër mund të jetë vonë”, shprehen ata, duke u bërë thirrje qytetarëve që të bashkohen për një mjedis më të pastër dhe më të shëndetshëm.
Në përgjigje të kësaj situate, Autoriteti Rrugor Shqiptar ka ndërmarrë herë pas here aksione pastrimi përgjatë akseve nacionale. Ndërhyrja më e fundit është kryer në aksin rrugor Korçë-Kapshticë, një ndër më problematikët përsa i përket ndotjes nga dora e njeriut.
Apeli është i qartë: mjedisi është pasuri e përbashkët dhe vetëm përmes kujdesit të përbashkët mund të garantojmë një të ardhme më të pastër për të gjithë!
