Pogradec – Një 44-vjeçar është arrestuar nga Policia e Pogradecit pasi iu gjetën në banesë një armë zjarri automatik dhe municion luftarak.
Operacioni policor i koduar “Befasia” u finalizua nga specialistët e Komisariatit të Policisë Pogradec, në kuadër të kontrolleve dhe hetimeve për goditjen e rasteve të armëmbajtjes pa leje dhe parandalimin e ngjarjeve kriminale.
Gjatë kontrollit të ushtruar në dy banesat që shtetasi me inicialet Besnik Baci ka në lagjen nr. 3 të Pogradecit dhe në fshatin Vërdovë, shërbimet e Policisë gjetën dhe sekuestruan një armë zjarri automatik, së bashku me municion luftarak.
Në vijim të veprimeve procedurale, 44-vjeçari u arrestua në flagrancë për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
