Një qendër e përbashkët rezidenciale për personat në nevojë është iniciativa e ndërmarrë nga Prefektura e Qarkut Korçë, me mbështetjen e gjashtë bashkive të qarkut.
Iniciativa u diskutua në një takim me drejtorin e Politikave dhe Koordinimit Territorial pranë Ministrisë së Punëve të Brendshme, Arben Xhaferi, ku u vlerësua pozitivisht nevoja për një zgjidhje të përbashkët në nivel qarku.
Qendra synon t’u ofrojë strehim dhe shërbime sociale e shëndetësore fëmijëve në situatë rruge, të moshuarve dhe personave me aftësi të kufizuara. Qëllimi është krijimi i një hapësire ku këto kategori të marrin përkujdesjen e nevojshme dhe të kenë mundësi për integrim social.
Të gjashtë bashkitë e Qarkut Korçë kanë shprehur dakordësinë për t’u bërë pjesë e këtij mekanizmi. Për realizimin e projektit pritet ngritja e një grupi të përbashkët ndërinstitucional, me përfaqësues të Ministrisë së Punëve të Brendshme, Ministrisë së Financave, Ministrisë së Shëndetësisë dhe Mirëqenies Sociale dhe bashkive të qarkut.
Ky grup do të përcaktojë mënyrën e funksionimit të qendrës dhe formën juridike të bashkëpunimit mes gjashtë bashkive.
Nisma është ende në fazën e diskutimit dhe formalizimit institucional, ndërsa hapi i radhës pritet të jetë përcaktimi i mënyrës së financimit dhe organizimit të shërbimeve që do të ofrohen.
