Këshilli Bashkiak i Maliqit ka nisur turin e konsultimeve publike me banorët në kuadër të reformës së re administrative-territoriale. Takimi i parë u zhvillua në Njësinë Administrative Libonik, ku diskutimet për të ardhmen e Bashkisë Maliq kanë sjellë qëndrime të ndryshme.
Një pjesë e banorëve, si edhe përfaqësues të Këshillit Bashkiak, janë shprehur kundër mundësisë së shkrirjes së Bashkisë Maliq dhe bashkimit të saj me Bashkinë Korçë. Sipas tyre, një ndryshim i tillë do të ndikonte në aksesin e qytetarëve në shërbime dhe do ta vështirësonte përditshmërinë, veçanërisht për banorët e njësive administrative.
Por gjatë konsultimit nuk kanë munguar as qëndrimet pro shkrirjes së bashkisë. Disa banorë kanë argumentuar se struktura aktuale nuk është efikase dhe se një riorganizim territorial mund të jetë i nevojshëm.
Konsultimet publike do të vijojnë edhe në njësitë e tjera administrative të Bashkisë Maliq gjatë ditëve në vijim. Në përfundim të këtij procesi pritet të mblidhen qëndrimet e komuniteteve dhe propozimet e tyre lidhur me reformën e re administrative-territoriale.
