Shqipëria vijon të jetë e ekspozuar ndaj rreziqeve natyrore dhe aksidentale, ndërsa sigurimi i pronave mbetet në nivele të ulëta. Sipas të dhënave të publikuara për tregun e sigurimeve, dëmshpërblimet për pronën në 6-mujorin e parë të vitit 2026 janë rritur me 84.18% krahasuar me të njëjtën periudhë të një viti më parë.
Tërmetet, zjarret, përmbytjet dhe rrëshqitjet e dherave renditen ndër rreziqet kryesore që kërcënojnë pronat në vend. Shqipëria klasifikohet ndër vendet evropiane me rrezik të lartë sizmik, ndërsa zona të konsiderueshme të territorit paraqesin rrezik nga përmbytjet dhe rrëshqitjet e dherave.
Sipas një studimi të Sigurime.Online, sigurimi i pronës përbën vetëm 10.6% të sigurimeve të blera në vitin 2026. Nga rreth 123 mijë biznese dhe 755 mijë familje në vend, vetëm rreth 5 mijë biznese dhe 40 mijë familje kanë sigurim prone.
Bazuar në të dhënat e 6-mujorit të parë, studimi vlerëson se dëmi potencial i pasiguruar për familjet dhe bizneset mund të arrijë në mbi 15.3 miliardë lekë, ose rreth 164 milionë euro gjatë vitit 2026.
Ndërkohë, tregu i sigurimeve ka vijuar të paguajë dëmshpërblime për pronat e siguruara. Në 6 muajt e parë të vitit, industria me tetë kompani operuese ka paguar 407.7 milionë lekë dëmshpërblime për dëmet në pronë, ndërsa SIGAL INSURANCE GROUP ka paguar 144.7 milionë lekë.
Të dhënat nënvizojnë nevojën për rritjen e ndërgjegjësimit të qytetarëve dhe bizneseve për sigurimin e pronave, veçanërisht përballë shtimit të rreziqeve natyrore dhe dëmeve të shkaktuara prej tyre.
