Artistja e njohur Ermira Babaliu u rikthye në skenën e Pogradecit me një koncert të veçantë, duke sjellë emocione, nostalgji dhe duartrokitje të shumta nga publiku. E mirëpritur ngrohtësisht nga spektatorët dhe pushuesit, ajo e cilësoi rikthimin në qytetin liqenor si një nga përjetimet më të bukura artistike.
Pas koncertit, Babaliu u shpreh se të performosh në Pogradec ka një ndjesi të veçantë, pasi, sipas saj, bukuria e liqenit dhe dashuria e publikut e bëjnë çdo interpretim të paharrueshëm.
Në skenë ishte e ftuar edhe këngëtarja e re Ermioni Topçiu, e cila e cilësoi privilegj bashkëpunimin me Ermira Babaliun, duke theksuar se ajo ka qenë një nga mbështetëset dhe frymëzimet më të rëndësishme në fillimet e karrierës së saj.
Koncerti solli një repertor të pasur me serenata, muzikë rock dhe këngë popullore, duke mbajtur për më shumë se dy orë të mbërthyer publikun në një atmosferë plot emocion dhe nostalgji.
