Një fëmijë vetëm 1 vjeç ndodhet prej ditës së sotme në Institucionin e Ekzekutimit të Vendimeve Penale në Pojskë, ku po qëndron pranë nënës së tij, 34 vjeçe, e cila po vuan një dënim me burg prej dy muajsh.
Gruaja u arrestua një ditë më parë në Pikën e Kalimit Kufitar të Murrqanit, teksa po kthehej nga Gjermania, në zbatim të një vendimi gjyqësor të formës së prerë, të dhënë në mungesë në vitin 2023. Ajo është dënuar për veprën penale “Dhunë në familje” ndaj vjehrrit të saj.
Sipas familjarëve, 34-vjeçarja është nënë e tre fëmijëve të mitur. Njëri prej tyre është 4 vjeç dhe vuan nga probleme shëndetësore, i dyti është 2 vjeç, ndërsa më i vogli, vetëm 1 vjeç, është dërguar pranë nënës në burgun e Pojskës.
Familjarët pretendojnë se vjehrri e ka falur nusen dhe se dënimi prej dy muajsh duhej të ishte përfshirë në amnistinë penale. Megjithatë, institucionet kanë ekzekutuar vendimin gjyqësor në fuqi.
Ndërkohë, gjatë ditës së sotme pritet që Avokati i Popullit të zhvillojë një vizitë në burgun e Pojskës për t’u takuar me 34-vjeçaren, me qëllim verifikimin e rrethanave të rastit dhe të kushteve në të cilat po qëndron fëmija 1-vjeçar së bashku me nënën e tij.
