Aktori dhe aktivisti Florjan Binaj ka deklaruar se nuk është më pjesë e nismës “Kuvendi Qytetar”, duke u distancuar nga organizimi i protestave kundër projektit në Zvërnec.
Në një intervistë, Binaj u shpreh se takimi i fundit i Kuvendit Qytetar i është dukur i stisur dhe se nuk është dakord me mënyrën se si po organizohet lëvizja. Sipas tij, protesta ka humbur karakterin qytetar dhe aktualisht “nuk ka kokë”, duke nënkuptuar mungesën e një drejtimi dhe organizimi të qartë.
Ai theksoi se nuk ka pasur asnjë rol drejtues në këtë nismë dhe se pjesëmarrja e tij ka qenë si qytetar. Binaj shtoi se nuk dëshiron të jetë pjesë e proceseve që, sipas tij, nuk garantojnë transparencë dhe përfaqësim të vërtetë të qytetarëve.
Deklaratat e tij vijnë në një moment kur protestat për çështjen e Zvërnecit kanë sjellë debate të shumta publike dhe politike, ndërsa vetë lëvizja qytetare po përballet me diskutime të brendshme mbi organizimin dhe drejtimin e saj.
