Fermerët e juglindjes së vendit po kërkojnë ndërhyrje konkrete nga qeveria për sigurimin e prodhimeve bujqësore, të cilat vitet e fundit janë dëmtuar rëndë nga fenomenet natyrore si breshëri, ngricat dhe përmbytjet.
Në Devoll, prodhimi i mollës është goditur vazhdimisht nga breshëri, ndërsa në zonën e Dvoranit temperaturat e ulëta kanë shkaktuar dëme të mëdha në prodhimin e qershisë. Po ashtu, përmbytjet në fushën e Maliqit kanë lënë nën ujë qindra hektarë tokë bujqësore.
Sipas fermerëve, mungesa e një skeme funksionale sigurimi mbetet një nga problemet më të mëdha të sektorit, pasi kompanitë private të sigurimit hezitojnë të mbulojnë zonat me risk të lartë.
Fermeri Ferdinand Ali thotë se kompanitë aktualisht mbulojnë kryesisht dëmet nga breshëri, ndërsa fatkeqësitë e tjera natyrore po shkaktojnë humbje të konsiderueshme për fermerët. Ai kërkon që shteti të marrë një pjesë të riskut përmes skemave mbështetëse ose subvencionimit të primeve të sigurimit.
Në të njëjtën linjë është edhe drejtori i Drejtorisë së Ekstensionit Bujqësor në Korçë, Vullnet Gjolla, i cili sugjeron krijimin e një fondi kombëtar ku të kontribuojnë shteti dhe fermerët. Sipas tij, një model i tillë do të ndihmonte në përballimin e dëmeve nga fatkeqësitë natyrore dhe do të garantonte më shumë siguri për sektorin bujqësor.
Fermerët kërkojnë që sigurimi bujqësor të mos mbetet vetëm në nivel premtimesh, por të shndërrohet në një mekanizëm real mbështetës. Në kushtet e ndryshimeve klimatike dhe shtimit të fenomeneve ekstreme të motit, ata e konsiderojnë sigurimin e prodhimit si një domosdoshmëri për mbijetesën dhe zhvillimin e bujqësisë në juglindje të Shqipërisë.
