Në një moment kur protestat kundër qeverisë kanë hyrë në një fazë të re dhe kur brenda Partisë Socialiste duket se kanë nisur pakënaqësitë e para të hapura, dy deputete socialiste kanë dhënë mesazhe tërësisht të kundërta.
Ish-ministrja Elisa Spiropali, e cila mungoi në mbledhjen e fundit të grupit parlamentar ku kryeministri Edi Rama u ankua se socialistët e kishin lënë vetëm përballë protestës, reagoi në rrjetet sociale duke kërkuar një “Marrëveshje të Re për Shqipërinë”. Spiropali shkroi se PS duhet “të mbledhë mendjen”, “të vetëpastrohet” dhe të mbetet “pa smërçe, pa ndryshqe, pa pehlivanllëqe”.
Por një tjetër deputete socialiste, Romina Kuko, duket se i është përgjigjur pikërisht kësaj fryme. Në një status të gjatë, Kuko godet retorikën e “Shqipërisë së Re”, duke e quajtur “oportunizëm politik veshur me flamur”.
“Pa emër, pa parti, pa platformë, askush nuk mban përgjegjësi nëse gjërat shkojnë keq, po nëse shkon mirë atëherë del si themelues i saj”, shkruan Kuko.
Në thelb, mesazhi i Kukos është i drejtpërdrejtë: kush kërkon “Shqipërinë e Re”, duhet ta nisë nga vetja, nga përgjegjësia personale dhe politike, jo nga distancimi publik kur situata bëhet e vështirë.
