Laçi është shpallur kampion i Kategorisë së Parë pas një finaleje dramatike dhe të tensionuar ndaj Skënderbeut në Korçë, ku gjithçka u vendos në sekondat e fundit të sfidës.
Ndeshja, që përballi dy skuadrat e ngjitura tashmë në Superiore, ishte një duel i fortë për trofeun e kampionit, por u shoqërua nga polemika të shumta në fushë dhe tension në tribuna. Momenti më i diskutueshëm erdhi pas një aksioni të dyshimtë në zonën e Laçit, ku arbitri Florian Lata ndëshkoi me karton të kuq një futbollist të Skënderbeut, vendim që ndryshoi rrjedhën e takimit dhe shkaktoi reagime të forta nga vendasit.
Edhe pse me një lojtar më pak, Skënderbeu arriti të mbante barazimin deri në minutat shtesë, rezultat që i mjaftonte për të fituar titullin. Por kur gjithçka dukej drejt fundit, në sulmin e fundit të Laçit pas një goditjeje nga këndi, laçjanët gjetën golin që tundi rrjetën korçare dhe rrëmbeu titullin kampion.
Pas golit shpërthyen protestat e forta të lojtarëve dhe tifozëve korçarë, të cilët kundërshtuan faktin se goli u shënua në minutën e 97-të, ndërkohë që arbitri kishte akorduar vetëm 5 minuta shtesë.
Në përfundim, presidenti i FSHF-së Armand Duka i dorëzoi kupën skuadrës së Laçit, ndërsa prania e shtuar e forcave policore në stadium ishte e nevojshme për shkak të tensioneve dhe provokimeve mes tifozërive.
Pavarësisht finales së hidhur për Skënderbeun, si korçarët ashtu edhe Laçi sezonin e ardhshëm do të jenë pjesë e Kategorisë Superiore, ndërsa Pogradeci do të kërkojë rikthimin në elitë përmes ndeshjeve play-off.
