Laçi ka fituar sot titullin kampion në Kategorinë e Parë pas një fitoreje dramatike në minutën e fundit shtesë me shifrat 1-0 në Korçë përballë Skënderbeut vendas që kishte kryesuar kampionatin prej fillimit të tij.
Skuadra kurbinase shënoi me Kurtin në fundin e takimit dhe mori tre pikët që lanë të tronditur vendasit. Kjo shihej qartë nga shikimi i presidenti të Skënderbeut, Ardian Takaj, i cili kishte mbetur i shtangur duke parë festimet e kurbinasve dhe se si ekipi i tij humbi titullin pikërisht në sekondat e fundit të sezonit.
Pas vërshëllimës përfundimtare, kurbinasit vazhduan festën, ndërsa lojtarët e Skënderbeut përfunduan në tokë të dëshpëruar, me portierin Dobjani i cili i përlotur u rrethua edhe nga tifozë që kishin hyrë në fushë.
Ndërkohë, në tribunë ishte presidenti i FSHF-së, Armand Duka, ai i cili përtej komplimenteve për presidentin e Laçit, Pashk Laskaj, shihet teksa po bënte shaka me të.
