Himara ka çelur zyrtarisht sezonin turistik 2026, duke mirëpritur vizitorët me një program të pasur aktivitetesh artistike, kulturore dhe festive që do të shtrihen gjatë gjithë muajve të verës.
Sezoni është hapur me koncerte, panaire dhe evente të ndryshme të konceptuara për të përfshirë të gjitha grupmoshat, ndërsa atmosfera festive pritet të kulmojë në pikun e sezonit veror.
Kryebashkiaku i Himarës, Vangjel Tavo, deklaroi se këtë vit aktivitetet do të jenë më të shumta dhe të shpërndara në të gjithë kalendarin turistik, me synimin për të tërhequr më shumë turistë dhe për të promovuar Himarën si një nga destinacionet më të rëndësishme bregdetare në Shqipëri.
Sipas Tavos, sezoni turistik ka nisur rreth një muaj më herët krahasuar me vitet e kaluara, ndërsa qyteti ka regjistruar një fluks të lartë pushuesish vendas dhe të huaj. Referuar edhe komunikimeve me operatorët turistikë, kapacitetet akomoduese rezultojnë pothuajse plotësisht të prenotuara deri në muajin nëntor.
Kryebashkiaku theksoi gjithashtu se investimet në infrastrukturë publike, përmirësimi i shërbimeve dhe zgjerimi i njësive akomoduese kanë ndikuar ndjeshëm në rritjen e interesit për Himarën, duke i dhënë qytetit një zhvillim të ri turistik dhe ekonomik.
Me plazhet, traditën, aktivitetet kulturore dhe investimet në rritje, Himara synon të mbetet një nga pikat më të preferuara të turizmit veror në vend.
