Plas debat në PD e Korçës, kandidat për kryetar ironizon me “ndryshimin e emrit” për shkak të fesë
Një reagim i fortë dhe me nota ironie ka ardhur nga një prej pretendentëve për drejtimin e degës së Partisë Demokratike në Korçë, duke ngritur akuza për ndikim të përkatësisë fetare në procesin e kandidimit.
Në një postim publik, Bravaldi Xhafka sugjeron se gara nuk po zhvillohet mbi bazën e meritës, por mbi kritere të tjera, duke përdorur edhe një paralelizëm historik me shqiptarët që në emigracion detyroheshin të ndryshonin emrat për të mbijetuar.
Në mënyrë simbolike dhe sarkastike, kandidati deklaron se ka vendosur të ndryshojë emrin e tij në “Niko”, për të përmbushur atë që ai e konsideron si “kriter të pashprehur” brenda strukturave lokale të partisë. Ai gjithashtu thekson se procesi i përzgjedhjes së kandidatëve ende nuk është mbyllur, ndonëse zgjedhjet janë shumë pranë, duke kërkuar rishqyrtim të garës.
Më poshtë, reagimi i plotë i tij:
“Plas sherri fetar në PD e Korçës, kandidati për kryetar të kësaj dege – “Do ndryshoj emrin, do e vendos Niko”
Na ishte njëherë një djalë nga Korça, që mendoi se në politikë hyn me punë, me sakrificë dhe me fytyrë të pastër.
U rrit me këtë mendje… derisa një ditë i thanë: “Jo mor bir, këtu nuk mjafton kush je… duhet edhe çfarë feje ke.”
Djali u mendua pak dhe i erdhi ndër mend një kohë e vjetër… kur shqiptarët merrnin rrugët e kurbetit dhe, për të mbijetuar, ndërronin emrin. Nga halli bëheshin Jorgo, Kostas, apo Niko… jo se donin, por se duhej.
Me sa duket, historia paska mbetur gjallë… vetëm se këtë herë nuk jemi në emigracion, jemi këtu, në shtëpinë tonë… në Partinë Demokratike të Korçës, në vitin 2026.
Kështu që mora një vendim të madh.
Nga sot, nuk jam më Bravaldi.
Jam Niko Xhafka.
Tani, meqë u rregullua edhe “kriteri” që mungonte, hajde ta shtyjmë garën, rishqyrtojeni dhe njëherë, meqë sot është data 22 Prill dhe zgjedhjet janë në 26 Prill dhe ende nuk kemi kandidaturat zyrtare.
Dhe meqë drejtuesve ju pëlqen shumë “Niko-ja”… madje aq shumë sa marrëveshjet i bëjnë gjithmonë me të, në kurriz të demokratëve, vendosa dhe unë të quhem kështu!
Tani e keni një Niko tuajin brenda shtëpisë, mendojeni dhe njëherë!
Veçse ky Nikoja juaj as shitet e as blihet!
Rroftë Partia Demokratike! ✌🏻”
