Java e 30-të e Kategorisë së Parë do të luhet e gjitha të shtunën, më 11 prill, dhe sipas zhvillimeve të fundit, kjo mund të jetë “java e Pogradecit”. Kjo pasi, ndryshe nga rivalët direkt për ngjitjen në elitë, Pogradeci është e vetmja nga kryesueset që luan në shtëpi, ndërsa Laçi dhe Skënderbeu do të zbresin në transfertë.
Megjithatë, ky sezon ka treguar se faktori fushë nuk ka qenë vendimtar për skuadrat e kreut, të cilat kanë marrë rezultate pozitive si në shtëpi, ashtu edhe jashtë saj. Por, në këtë moment delikat të sezonit, çdo detaj mund të bëjë diferencën. Pogradeci pret në “Gjorgji Kyçyku” Kukësi, pas një serie të jashtëzakonshme prej tetë fitoresh radhazi. Objektivi është i qartë: trepikëshi i radhës për të vazhduar marshimin drejt elitës. Nga ana tjetër, edhe Kukësi vjen në formë të mirë, me një ecuri pozitive në gjashtë javët e fundit (tre fitore dhe tre barazime). Skuadra e trajnerit Bledi Kadiu synon të marrë pikë në këtë transfertë të vështirë, për të vijuar ngjitjen në renditje dhe për të shmangur rrezikun e rënies.
Duke qenë i vetëdijshëm për rëndësinë e kësaj sfide, klubi pogradecar u ka bërë thirrje tifozëve që të mbushin stadiumin dhe të mbështesin skuadrën në këtë moment vendimtar: “Një tjetër sfidë e rëndësishme na pret në shtëpi, aty ku forca jonë bëhet dyfish. Pogradeci–Kukësi, ora 15:00. Ju mirëpresim në stadium”. Përveç detyrës së tyre, liqenorët hedhin sytë edhe nga ndeshjet e rivalëve. Kastrioti dhe Burreli do të presin respektivisht Laçin dhe Skënderbeun, në duele që mund të ndikojnë drejtpërdrejt në renditje. Nëse rivalët gabojnë dhe Pogradeci bën detyrën, kjo javë mund të shënojë kthesën më të madhe të sezonit për liqenorët.
