Specialistët e Seksionit për Hetimin e Krimeve Ekonomike dhe Financiare në Drejtorinë Vendore të Policisë Korçë referuan materialet në Prokurori dhe nisi procedimi penal për shtetasin F. C., 33 vjeç, banues në Korçë. Gjatë kontrollit në dyqanin e tij u gjetën veshje të dyshuara të kontrabanduara, të cilat nuk shoqëroheshin me faturat përkatëse.
Ndërkohë, specialistët për Hetimin e Krimeve të Komisariatit të Policisë Korçë referuan materialet në Prokurori për shtetasen E. D., 57 vjeçe, banuese në Korçë, e cila dyshohet se i ka vjedhur një shtetaseje një shumë parash nga portofoli.
Në Pogradec, specialistët për Hetimin e Krimeve referuan materialet në Prokurori për shtetasin P. L., banues në fshatin Leshnicë, pasi dyshohet se nga zjarri që ka ndezur për të djegur mbeturina është djegur një sipërfaqe toke.
Po ashtu, specialistët për Hetimin e Krimeve të Komisariatit të Policisë Maliq referuan materialet në Prokurori për shtetasit A. M., 25 vjeç dhe P. M., 22 vjeç, banues në fshatin Vloçisht, pasi dyshohet se janë konfliktuar fizikisht me një 37-vjeçar.
Materialet procedurale i kaluan Prokurorisë së Korçës për veprime të mëtejshme.
