Një tjetër rast dhune është regjistruar në zonën e Maliqit, ku protagonist është i njëjti person që më parë ka pasur probleme me ligjin.
Specialistët për Hetimin e Krimeve në Komisariatin e Policisë Maliq kanë referuar materialet në Prokurori dhe kanë nisur procedimin penal ndaj shtetasit Albert Lipo, 57 vjeç, banues në fshatin Leshnicë.
Sipas policisë, 57-vjeçari dyshohet se, për motive të dobëta, ka goditur një 17-vjeçar, me të cilin udhëtonte në të njëjtin automjet të transportit publik.
Burime lokale bëjnë me dije se kjo nuk është hera e parë që Lipo përfshihet në akte dhune. Ai është proceduar edhe më parë nga Policia e Pogradecit, pasi kishte ushtruar dhunë ndaj bashkëshortes së tij.
Rasti i fundit ngre sërish shqetësime për përsëritjen e incidenteve të dhunshme nga i njëjti person, ndërsa materialet procedurale janë referuar në Prokurorinë e Korçës, e cila pritet të ndërmarrë veprimet e mëtejshme ligjore.
