Policia Kufitare ka intensifikuar kontrollet me qëllim parandalimin dhe goditjen e paligjshmërive në kufi, duke evidentuar një tjetër rast kontrabande në PKK Kapshticë.
Gjatë kontrolleve sistematike dhe atyre të bazuara në informacionet e siguruara në rrugë operative, shërbimet e DVKM Korçë, në hyrje të RSH-së, në PKK Kapshticë, në bashkëpunim me shërbimin doganor, kaluan për kontroll në vijën e dytë një automjet me drejtues shtetasin K. G., 36 vjeç, banues në fshatin Hasmashaj, Peqin.
Nga kontrolli i ushtruar në automjet u gjetën një sasi produktesh pesticide pa licencë nga organet kompetente, fidanë pemësh frutore dhe mjete të tjera pune, të cilat dyshohet se ishin futur në territorin e vendit në mënyrë të kundërligjshme. Produktet dhe automjeti u sekuestruan në cilësinë e provës materiale.
Në vijim të veprimeve procedurale, materialet iu referuan Prokurorisë pranë Gjykatës së Shkallës së Parë Korçë, ku nisi procedimi penal ndaj shtetasit K. G., për veprat penale “Kontrabanda me mallra të licencuara” dhe “Kontrabanda me mallra të tjera”.
Materialet procedurale i kaluan Prokurorisë së Korçës për veprime të mëtejshme.
Gjithashtu, nga shërbimet e patrullës së Stacionit të Policisë Kufitare Kapshticë (kufiri tokësor), në afërsi të fshatit Vidohovë, Devoll, u kapën 5 migrantë të parregullt, të cilët u trajtuan me urdhër largimi vullnetar nga territori i Republikës së Shqipërisë.
