Policia e Qarkut Korçë ka referuar materiale në Prokurori për disa raste të veprave penale të evidentuara gjatë kontrolleve dhe verifikimeve në territor.
Specialistët për Hetimin e Krimeve të DVKM Korçë kanë nisur procedim penal për shtetasin G. Sh., 58 vjeç, banues në fshatin Pojan, Maliq, për veprën penale “Falsifikimi i vulave, i stampave ose i formularëve”. Gjatë kontrollit në PKK Kapshticë, në dalje të Shqipërisë, në pasaportën e tij u konstatua një vulë e shtetit grek, e dyshuar false.
Po ashtu, Specialistët e Sektorit për Hetimin e Narkotikëve referuan materialet në Prokurori për shtetasin N. K., 23 vjeç, banues në fshatin Zerec, Maliq, pasi gjatë kontrollit në automjetin që drejtonte, në qytetin e Korçës, iu gjet dhe sekuestrua një sasi e vogël lënde e dyshuar narkotike, kokainë.
Në Devoll, Specialistët për Hetimin e Krimeve të Komisariatit të Policisë kanë nisur procedim penal ndaj shtetasit S. P., 24 vjeç, banues në Bilisht, pasi gjatë kontrollit në automjetin e tij u gjet dhe u sekuestrua një mjet prerës (thikë).
Ndërkohë, Specialistët për Hetimin e Krimeve të Komisariatit të Policisë Pogradec kanë referuar materialet në Prokurori për shtetasin E. Z., 20 vjeç, banues në Pogradec, pasi është konfliktuar fizikisht me një të mitur 13-vjeçar.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
