Drejtoria Vendore e Policisë Korçë ka zhvilluar disa operacione gjatë 24 orëve të fundit, duke finalizuar arrestime, procedime penale si dhe ndalimin e një shtetasi në kërkim.
Specialistët për Hetimin e Trafiqeve të Paligjshme ekzekutuan urdhrin e Prokurorit për ndalimin e shtetasit E. Z., 28 vjeç, banues në fshatin Ponçarë, Devoll. Ky shtetas ishte shpallur në kërkim, pasi Gjykata e Apelit e Juridiksionit të Përgjithshëm Tiranë, me vendimin e datës 16.07.2025, e ka dënuar me 2 vjet e 10 muaj burgim për veprën penale “Ndihma për kalim të paligjshëm të kufijve”, kryer në bashkëpunim.
Ndërkohë, shërbimet e Sektorit të Qarkullimit Rrugor arrestuan në flagrancë dy drejtues mjetesh për drejtim automjeti në gjendje të dehur:
- F. T., 55 vjeç, banues në Ersekë;
- A. Th., 45 vjeç, banues në fshatin Rehovë, Kolonjë.
Nga ana e Specialistëve për Hetimin e Krimeve të Komisariatit të Policisë Korçë u arrestua në flagrancë shtetasi M. P., 35 vjeç, banues në fshatin Dishnicë. Ai u kap jashtë banesës, në kundërshtim me masën e sigurisë “Arrest në shtëpi”, të caktuar nga Gjykata e Apelit Tiranë për veprën penale “Shkelja e rregullave të qarkullimit rrugor”. Gjithashtu, dyshohet se ky shtetas ka përndjekur një 33-vjeçare.
Po ashtu, u referuan materialet në Prokurori dhe nisi procedimi penal për shtetasin R. F., 35 vjeç, banues në Korçë, i cili dyshohet se ka vjedhur 4 koshere bletësh në oborrin e banesës së një shtetasi tjetër.
Në një njoftim tjetër, Policia bën me dije se më 06.02.2026, në Komisariatin e Policisë Korçë është paraqitur shtetasi K. T., 25 vjeç, banues në fshatin Moravë, i cili ka kallëzuar largimin nga banesa të babait të tij, F. T., 54 vjeç. Policia po punon për gjetjen e tij.
Materialet procedurale iu referuan Prokurorisë së Korçës për veprime të mëtejshme.
