Strukturat e Policisë në Qarkun e Korçës kanë referuar materiale në Prokurori, ku kanë nisur procedime penale për disa shtetas, të dyshuar për vepra të ndryshme penale.
Specialistët për Hetimin e Krimeve të DVKM Korçë referuan materialet në Prokurori dhe nisi procedimi penal për shtetasin D. K., 34 vjeç, banues në fshatin Halilaj, Fushë Krujë, për veprën penale “Kalimi i paligjshëm i kufirit shtetëror”, pasi dyshohet se ka kaluar ilegalisht në Greqi.
Nga Specialistët për Hetimin e Krimeve të Komisariatit të Policisë Korçë u referuan materialet në Prokurori dhe nisi procedimi penal për shtetasit:
- F. J., 35 vjeç, banues në fshatin Mborje, Korçë, pasi dyshohet se ka kanosur me mjet prerës (thikë) shtetasin D. E., për motive të dobëta;
- B. M., 45 vjeç, banues në Korçë, pasi dyshohet se në një dyqan të një kompanie celulare ka filmuar punonjësen, shtetasen V. Sh., pa pëlqimin e saj. Celulari i përdorur u sekuestrua në cilësinë e provës materiale.
Specialistët për Hetimin e Krimeve të Komisariatit të Policisë Pogradec referuan materialet në Prokurori për shtetasin E. H., 32 vjeç, banues në fshatin Hudënisht, Pogradec. Gjatë kontrollit në lokalin e tij u gjet një peshore elektronike me mbetje të lëndës së dyshuar narkotike kokainë. Po ashtu, gjatë kontrollit të dy celularëve të tij, u konstatuan faqe aktive për baste sportive. Nga verifikimet rezultoi se 32-vjeçari ushtronte aktivitetin në lokal pa e regjistruar në organet tatimore. Peshorja elektronike dhe dy celularët u sekuestruan si prova materiale.
Nga Komisariati i Policisë Kolonjë u referuan materialet në Prokurori dhe nisi procedimi penal për shtetasin R. Xh., 57 vjeç, banues në Ersekë, i dyshuar se ka vjedhur një shumë parash në banesën e shtetasit N. J.
Ndërkohë, Specialistët për Hetimin e Krimeve të Komisariatit të Policisë Maliq referuan materialet në Prokurori për:
- E. K., 35 vjeç, banues në Korçë, pas kallëzimit të shtetasit N. Ç., i cili pretendon se një javë më parë i ka vjedhur një shumë parash në banesën e tij në fshatin Kolanec, Maliq;
- A. O., 50 vjeç, banues në fshatin Sovjan, Maliq, pasi dyshohet se ka ushtruar dhunë psikologjike ndaj bashkëshortes së tij.
Gjithashtu, më datë 19.01.2026, në Komisariatin e Policisë Pogradec ka bërë kallëzim shtetasi L. H., 44 vjeç, banues në Pogradec, i cili ka deklaruar se është konfliktuar fizikisht në rrugë me tre shtetas ende të paidentifikuar. Po punohet për identifikimin dhe kapjen e autorëve.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
