Korçë – Drejtoria Vendore e Kufirit dhe Migracionit Korçë ka goditur një tjetër rast të mosdeklarimit të shumave monetare në kufi.
Shërbimet e Seksionit për Hetimin e Krimit të DVKM Korçë, në vijim të punës për parandalimin dhe goditjen e paligjshmërisë, bazuar në informacione të siguruara në rrugë operative, kanë ndaluar për kontroll një automjet në afërsi të Stacionit të Policisë Kufitare Kapshticë.
Gjatë kontrollit fizik, shtetasit Gj. F., 67 vjeç, banues në Korçë, iu gjetën të fshehura në trup 38 000 dollarë amerikanë, të cilat nuk ishin deklaruar sipas legjislacionit në fuqi.
Më tej, gjatë kontrollit të ushtruar në banesën e tij, specialistët e Policisë gjetën dhe sekuestruan edhe 35 000 euro. Të gjitha shumat monetare u sekuestruan në cilësinë e provës materiale.
Në përfundim të veprimeve procedurale, materialet iu referuan Prokurorisë, ku ndaj 67-vjeçarit nisi procedimi penal për veprat:
- “Mosdeklarimi në kufi i të hollave dhe sendeve me vlerë”
- “Pastrimi i produkteve të veprës penale ose veprimtarisë kriminale”
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme ligjore.
