Karnavalet e Vevçanit në Maqedoninë e Veriut, të zhvilluara me rastin e Vitit të Ri 2026 sipas kalendarit julian, u shndërruan edhe këtë vit në një skenë satire politike dhe reflektimi shoqëror. Në mesin e personazheve të maskuar, vëmendje të veçantë tërhoqën figurat që ironizonin qeverinë shqiptare, kryeministrin Edi Rama, policinë dhe ministren “Diella”, një formë tipike për karnavalet e Vevçanit, ku kritika shprehet përmes humorit dhe groteskut.
“Kjo është ministrja artificiale e Shqipërisë, kryeministri dhe Diella. Ajo është këtu sepse ne nesër do t’i japim ryshfet, jo sot, do t’i japim ryshfet nesër”,
ndërsa një i ri nga turma ndërhyri me thirrjen “Zero korrupsion”, duke e thelluar më mesazhin satirik.
Banorët theksojnë se festimi dhe maskimi në Vevçan trashëgohen prej më shumë se dy mijë vitesh dhe lidhen drejtpërdrejt me ardhjen e Vitit të Ri. Sipas tyre, çdo vizitor është i mirëpritur, pa asnjë dallim origjine duke nënvizuar se përmes karnavaleve ironizojnë dhe reflektojnë mbi veprimet e politikanëve, biznesmenëve dhe figurave publike.
“Ne vevçanasit, nga 365 ditë të vitit, 364 ditë nuk mbajmë maskë, ndërsa ditën e 365-të vendosim maskë. Ata që 364 ditë mbajnë maskë në fytyrë, ditën e 365-të vijnë në Vevçan për të parë se si kanë qenë gjatë gjithë vitit.
Zakonisht, të gjitha gjërat jonormale që kanë ndodhur nga politikanë, nga biznesmenë e kështu me radhë, vevçanasit pa marrë parasysh se nga vijnë qeshin me to.”
“Festojmë Shën Vasilin, që përkon me Vitin e Ri, këtu në Vevçan. Jemi duke imituar gjermanët, si në festën e birrës, por ndryshe nga ata jemi të veshur me rrobat tone popullore tradicionale. Këtë festë ne e kemi të trashëguar brez pas brezi dhe sot po e trashëgojnë njëjtë edhe të rinjtë”
Karnavalet përkojnë me festimin e Shën Vasilit, që në RMV lidhet me Vitin e Ri. Edhe pse disa e krahasojnë atmosferën me festa të njohura europiane, vevçanasit theksojnë se dallimi qëndron te veshjet popullore tradicionale dhe trashëgimia autentike, e transmetuar brez pas brezi dhe e ruajtur sot edhe nga të rinjtë.
Këto karnavale, mblodhën këtë vit mbi 400 pjesëmarrës të maskuar, duke konfirmuar edhe një herë Vevçanin si një nga ngjarjet më unike kulturore dhe satirike në rajon.
