Nga Rafaela Prifti
Në ambientet e Federatës Panshqiptare të Amerikës “Vatër” u zhvillua përurimi i parë në Shtetet e Bashkuara i librit “Ëndrra Amerikane”, një vepër që vlerëson trashëgiminë e suksesit shqiptaro-amerikan dhe rrugëtimin e vështirë nga diktatura drejt lirisë.
Përshëndetjen hapëse e mbajti editori i gazetës “Dielli”, Sokol Paja, i cili prezantoi të pranishmit me Prof. Dr. Eris Rusi, personalitet i njohur i shkencave humane, si dhe me autorin e librit Beqir Potka, vatran dhe sipërmarrës nga Nashville. Potka rrëfeu kalvarin e vuajtjeve gjatë regjimit komunist dhe historinë e suksesit të tij në tokën e lirisë.
Autori ndau me të pranishmit frymëzimin që kishte ndjerë nga figura e Fan Nolit, gjatë studimeve në shkollën teologjike Holy Cross në Boston, pas mbërritjes në Amerikë. Ai theksoi se në momentet kyçe të jetës së tij, si në Shqipëri, në kampin e Lavrios në Greqi dhe më pas në SHBA, ka ndjerë gjithmonë dorën udhëheqëse të Perëndisë.
Përurimi u moderua nga Rafaela Prifti, editore e seksionit në anglisht, e cila u ndal në momente domethënëse të historisë së rrëfyer në libër, duke ndërthurur pyetje për autorin dhe Prof. Rusin me episode nga biografia “Ëndrra Amerikane”.
Prof. Dr. Eris Rusi, shef i Katedrës së Gjuhës dhe Letërsisë në Universitetin “Fan Noli” Korçë, theksoi se tema kyçe e librit është nevoja e njeriut për të ndjerë besimin e Perëndisë në jetën e tij, duke e cilësuar veprën si një biografi të letrarizuar. Ai argumentoi gjithashtu se pasojat familjare janë emërues i përbashkët i arratisjeve gjatë diktaturës.
Moderatorja Rafaela Prifti nënvizoi se “arratisjet politike gjatë komunizmit dhe eksodi shqiptar sot gjejnë pasqyrim në libër”, duke theksuar se “atëherë largimet ishin të detyruara nga diktatura, ndërsa sot nga dëshpërimi”.
Në fjalën e tij, Beqir Potka theksoi se shqiptarët ndajnë vlera të përbashkëta kombëtare, pavarësisht rrugëve të ndryshme të jetës.
Në mbyllje të përurimit, Prof. Rusi lexoi dhe prezantoi poezinë “Ditët e mia pa ty” nga vepra e Skënder Rusi, në përvjetorin e parë të ndarjes nga jeta, duke i dhuruar të pranishmëve emocione të veçanta dhe një moment reflektimi të thellë.
