Drejtoria Vendore e Policisë Korçë ka referuar materiale në Prokurori për disa raste të procedimeve penale, konflikteve dhe shkeljeve të ligjit, të evidentuara gjatë kontrolleve dhe veprimeve policore në territorin e qarkut.
Shërbimet e Komisariatit të Policisë Korçë kanë referuar materialet në Prokurori, ku ka nisur procedimi penal për shtetasit G. H., J. L., D. R. dhe M. P., banues në Korçë, pasi gjatë kontrollit të celularëve të tyre, në lokalet ku ndodheshin, u konstatuan faqe të basteve sportive.
Po nga këto shërbime, është proceduar penalisht shtetasi R. Xh., 43 vjeç, banues në Korçë, i cili u kap në lagjen nr. 17 duke tregtuar lëndë piroteknike (fishekzjarre) në kundërshtim me ligjin. Lëndët piroteknike u sekuestruan në cilësinë e provës materiale.
Gjithashtu, janë referuar materialet në Prokurori dhe është shpallur në kërkim shtetasi K. D., 27 vjeç, banues në Korçë. Në lagjen nr. 12, në ambientet e një lokali, dyshohet se ky shtetas ka goditur për motive të dobëta punonjësin e sigurisë F. L., 53 vjeç, i cili ndodhet nën kujdesin e mjekëve në spitalin e Korçës, jashtë rrezikut për jetën.
Specialistët e Sektorit për Hetimin e Narkotikëve kanë referuar materialet në Prokurori, ku ka nisur procedimi penal për shtetasin R. D., 26 vjeç, banues në Korçë. Gjatë një kontrolli fizik në lagjen nr. 2, Pogradec, atij iu gjet dhe sekuestrua një sasi lënde e dyshuar narkotike e llojit kanabis.
Nga shërbimet e Komisariatit të Policisë Pogradec, ka nisur procedimi penal për shtetasit I. Ç., 55 vjeç dhe A. Ç., 27 vjeç, banues në fshatin Starovë, Pogradec. Në një lokal në lagjen nr. 1, Pogradec, dyshohet se për motive të dobëta ata janë konfliktuar fizikisht me shtetasin E. M.
Më datë 01.01.2026, ka bërë kallëzim shtetasi H. N., banues në fshatin Helmës, Kolonjë, i cili ka deklaruar se pas kthimit në banesën e tij me qira, në lagjen nr. 16, Korçë, ka konstatuar mungesën e një shume parash. Policia po punon për identifikimin dhe kapjen e autorit ose autorëve.
Ndërkohë, më datë 31.12.2025, në lagjen nr. 1 të Korçës, në shkallët e një pallati në katin e tretë, është gjetur i pajetë shtetasi E. Ç., 32 vjeç, banues në fshatin Pirg, Maliq. Nga këqyrja paraprake e trupit nuk janë konstatuar shenja dhune dhe dyshohet se kemi të bëjmë me vetëvarje.
