Krishtlindja është festuar edhe në qytetin e Korçës, ku me qindra besimtarë ortodoksë, por edhe turistë vendas e të huaj, kanë marrë pjesë në meshën solemne të mbajtur në katedralen “Ringjallja e Krishtit”.
Gjatë urimit të tij, Mitropoliti i Korçës, Imzot Anastasi, u lut për paqe mes njerëzve dhe Perëndisë, duke theksuar se mirësia dhe dashuria duhet të përkthehen në vepra konkrete në jetën e përditshme.
Besimtarët kanë shkëmbyer urime për Krishtlindje të bardha dhe një vit të mbarë, ndërsa qyteti ka njohur një fluks të shtuar turistësh që kanë zgjedhur juglindjen e vendit për të kaluar festat.
Një turist gjerman, i martuar me një korçare dhe besimtar ortodoks, shprehet:
“Kënaqësia ime është dyfish. Ajo që i uroj Shqipërisë është paqja. Paqja na duhet në zemër.”
Sipas të dhënave zyrtare, mbi 95% e kapaciteteve hoteliere në Korçë janë të rezervuara për periudhën nga 24 Dhjetori deri më 5 Janar. Ndërkohë, vetëm në pak ditë, përmes pikës së kalimit kufitar të Kapshticës kanë hyrë mbi 30 mijë shtetas, duke e kthyer Korçën në një nga destinacionet më të preferuara të festave të fundvitit.
