Orkestra Simfonike e Korçës i ka rikthyer qytetit një nga pasuritë e tij më të çmuara kulturore, duke sjellë një koncert madhështor fundviti që u prit me entuziazëm nga publiku. Pas një periudhe mungese, dy vitet e fundit kjo orkestër është e kompletuar dhe tashmë prezantohet denjësisht me performanca që afrohen me nivelet e orkestrave simfonike më të njohura.
Në një sallë të tejmbushur të Teatrit “Andon Zako Çajupi”, publiku u përfshi nga tingujt festivë të muzikës botërore, nën dirigjimin e Petrika Afezollit, i cili drejtoi mjeshtërisht mbi 40 instrumentistë.
Dirigjenti Petrika Afezolli u shpreh se interesi i publikut është dëshmi e një klime kulturore të konsoliduar në Korçë:
“Shoh një interes të jashtëzakonshëm dhe kjo duartrokitje është plotësisht e merituar. Ka një bazë të mirë, një klimë shoqërore dhe intelektuale mbështetëse. Që në vitin 1920, Korça ka pasur synim filarmoninë, dhe kjo tregon se qyteti ka një traditë dhe një potencial të jashtëzakonshëm artistik.”
Nga ana tjetër, Ilir Zguri, instrumentist dhe njëkohësisht drejtor i Shkollës Artistike në Korçë, thekson se orkestra nuk është në fazë ringjalljeje, por në një nivel të konsoliduar artistik:
“Nuk bëhet fjalë për ringjallje, por për interpretim në nivele të larta. Sektorët janë të plotësuar dhe baza është vetë Orkestra e Korçës. Shumë shpejt do të kemi një brez shumë të mirë artistësh.”
Gjatë gjithë periudhës së festave të fundvitit, Korça do të vijojë të ofrojë aktivitete të shumta kulturore dhe artistike, si në teatër ashtu edhe në Pazarin e Vjetër dhe zonën pedonale, duke u kthyer në një destinacion të preferuar për turistët vendas dhe të huaj.
